Sò moeg!

Sò Moeg ..

Ek is sò moeg, O Heer ..
deur moegheid omgewe
kompleet of my lewe
in die barre aardkors .. ingeskoffel
met ‘n troffel
in klipgrondbedding se groef
afgemat .. lewensbeproef
vasgemessel
gekompakteer ..
O Heer .. ek wil U nie bedroef
ek is net .. sò moeg
geploeg ..

Ek weet .. o Heer
daar is ‘n lewensles hieruit te leer
.. net soos ‘n eg bogrond omkeer
en ‘n boer hom bemoei
met die diepte van ‘n gewas se wortelgroei
en die aard van die grondstruktuur
werksvermoeienis verduur
landerye bemes
om uit te roei enige pes ..
is die aardse lewe – voorbereiding
deur geloofsbewerking
ontkieming
tot die Ewige Lewe!

Al is ek verbý
moeg
O Heer
sál ek my in Jesus Christus verbly
want U Woord .. is vir my .. genoeg ..